İyulun 1-dən Azərbaycanda qadınların pensiya yaşı 65-ə çataraq kişilərin pensiya yaşı ilə tam bərabərləşib. Bununla da illər öncə qanunvericiliyə salınmış mərhələli artım prosesi öz məntiqi sonuna gəlib çatıb.

Report-a istinadən bildirilir ki, kişilər üçün eyni rəqəm hələ 2021-ci il iyunun 30-da tamamlanmışdı. Yəni kişilər həmin astanaya beş il əvvəl çatmışdı, qadınlar isə indi onları haqlayıb.

Mərhələli artımın mexanizmi

Prosesin kökündə "Əmək pensiyaları haqqında" qanunun 7-ci maddəsi dayanır. Həmin maddəyə əsasən, kişilərin yaş həddi 2017-ci il iyulun 1-dən 2021-ci il iyulun 1-dək, qadınların yaş həddi isə 2017-ci il iyulun 1-dən 2027-ci il iyulun 1-dək hər il 6 ay artırılır.

Qadınlar üçün rəsmi son tarix 2027-ci il olsa da, addımbaaddım artım nəticəsində 65 yaş həddinə çatmaq faktiki olaraq bu gün — 2026-cı il iyulun 1-i — reallaşıb.

Yaşa görə pensiya hüququ hansı şərtlərlə yaranır

Qanunun eyni maddəsinə görə, pensiya yaşına çatmış şəxsin yaşa görə əmək pensiyası hüququ iki ssenariyə bağlıdır:

• Əgər fərdi hesabın sığorta hissəsində qeydə alınmış pensiya kapitalı əmək pensiyasının minimum məbləğindən az olmayan pensiya təminatına imkan verirsə, bu halda sığorta stajından asılı olmayaraq pensiya təyin olunur.
• Əgər həmin kapital minimum təminata imkan vermirsə, onda azı 25 il sığorta stajı tələb olunur.

Bu şərtdən 2017-ci il iyulun 1-dək yaşa görə əmək pensiyası təyin edilmiş şəxslər istisna edilir.

Minimum pensiyanın məbləği hazırda 320 manat təşkil edir. Yaşa görə əmək pensiyası isə ömürlük təyin olunur.

Müəllif: Gülər Seymurqızı